Om

Nikolai Astrup Online Catalogue Raisonné (2016–2025) søker å etablere ei autentisk og kronologisk oversikt over Astrup sin kunst. Prosjektet har gjennomført ei omfattande kartlegging og digitalisering av historisk kjeldemateriale, som er relevant for kunstnarskapen. Dette materialet utgjer sentrale ressursar for catalogue raisonné og legg til rette for vidare forsking på alle sider av kunstnarskapen, som måleri, grafikk, teikningar, tekstile arbeid og fotografi.

Astrup sine brev og manuskript er ei sentral kjelde. Mange av desse handskriftene er tilgjengelege i det digitale arkivet, med faksimilar, transkripsjonar og engelske omsetjingar. Den engelske utgåva er utført i samarbeid mellom omsettar Francesca M. Nichols og Nikolai Astrup forskingssenter.

Den digitale verkskatalogen vart publisert 1. oktober 2020 og legg til rette for ei løpande publisering og revidering av materiale gjennom forskingsprosessane.

Prosjektet er fullfinansiert av Sparebankstiftelsen DNB og vert utført av Nikolai Astrup forskingssenter ved Kode Kunstmuseer og komponisthjem i Bergen, ved ph.d. Tove Haugsbø.