Det finst ingen kjente skildringar eller fotografi av dette måleriet, men Astrup sin tittel fortel at det viser Ålhustunet i vårstemning. Dei andre versjonane i serien av klyngetunet med soleier er sommarstemningar, hovudsakleg med «juni» i tittelen. Denne vårversjonen skil seg såleis frå desse.

Måleriet «Et vestlandstun i vårnatten» var utlånt til Astrup si utstilling i Kunstnerforbundet i 1911 av William Nygaard (1865–1952), som eigde forlaget H. Aschehoug & Co (W. Nygaard). Nygaard lånte også ut måleriet Lys juninatt, Jølster (K42), som han hadde kjøpt på Astrup si utstilling hos Blomqvist i 1905. Det er ikkje kjent når «Et vestlandstun i vårnatten» vart produsert, og heller ikkje når Nygaard kjøpte det. Astrup fører det ikkje opp i verkslista han foreslår for utstillinga i 1911, noko som kan tyde på at måleriet ikkje vart selt direkte til Nygaard av Astrup sjølv.