Det finst ingen kjente skildringar eller fotografi av dette måleriet, men Astrup sin tittel fortel at motivet er frå prestegarden på Ålhus i Jølster. Tunet er truleg husklynga som er vist i mellom anna Tun i Jølster (K25), men i ei anna stemning: ei lys sommarnatt.

Måleriet var til sals på Astrup si utstilling i Bergens kunstforening i 1908 for 60 kroner, men vart gjeve i gåve til Vilhelm Tvedt (1879–1940). På den tida var Tvedt journalist i Morgenavisen i Bergen, men året etter flytta han til hovudstaden, der han jobba som journalist først i Verdens Gang og Tidens Tegn og seinare Aftenposten og NRK. Astrup fører Tvedt opp som eigar i 1927, og det er også Tvedt som låner ut måleriet til minneutstillingane i Bergen og Oslo året etter. I utstillingskatalogen frå 1928 er måla 56 x 57 cm og signaturen «Astrup» oppført. Etter dette er historikken ukjent.